[D_33 // Bela crta i crna mrakača: Bilogorsko gajdanje kroz kal // A TALE FROM BILOGORA: The White Line and the Black Mud]

Denes bum pisal na materinjoj mi kajkavštini. Ak ti morti se ne bu mam jasno, moreš poiskati pomoč v Rječniku pitomačkog govora, pak ti bu valda sinulo kaj sem zaprav štel reči iliti napisal. Prvo bum ti zaželel sreču z čitanjem ovoga štiva. I to sreču neg ižu veču. Pak bum odma još nadodal, tak da se preveč ne brecneš, kaj v kajkavskom mi, eto ti ga na, lepo velimo i pišemo samo "č". Za drugo mi čuli morti nigdar ni nesmo, il smo pak pozabili več. Kaj god da je, nesmo mi bormeš ni v sibilarizaciju vpučeni. Kaj moreš? Baš ništ! Il čitaj dale se kaj piše, il odi pa se mam mekni i čkomi. Ak ti je pak drakše čitati dale, bum ti, evo, lepo sad rekel - ima bormeš dana kaj te negda tak lepo strefi se i sakaj, kaj opče ne zbrajaš kolko si kilometrov prešel. Tih dana rajši zbrajaš kolko te sega vudrilo, a opče se tome ni v crnom snu nesi, ama baš ni mrvičku nadal. Cela je to istina. Takvo ti je bilo moje zadnje gajdanje, prošle sobote, koje je išlo v krug, od Pitomače, do Velike Pisanice pa naze do Pitomače. Taj se krug pretvoril v Danteov pekel. Krug z malo preveč fulanja. Fulanje za fulanjem, fulanje za fulanjem - fort, jeno za drugim, kak ose na med, da ne velim nekaj bedasteše. Na kraju sega nesem znal el to se morti neka senja. Pem po redu, kak se se zdogađalo.

"Tam gdi grbavi put pripoveda sam z sebom."

Negdi, tam gore - na vrju Bilogore, tak je pukel lepi pogled da sem blenul ko tele v šarena vrata. Kakov več jesem, se razme, štel sem ga zatefteriti v memoriju mobitela. Z jenom sem rukom držal governala, a z drugom sem štel zeti mobitela. Moreš si sam v glavi narisati sliku kak je to več se zgledalo. Nu, probaj, ak več nesi. I tak, dok sem štel škljocnuti z mobitelom sliku, mobitel mi je tak lepo opal, znova - moreš si zamisliti v glavi kak lepo, i tresnul drito v špičastu bilogorsku kamenčurinu. Siguren sem, sad nemre biti da v glavi več nemaš sliku mene z mobitelom v rukama na kojem se najemput zrodila ravna, ravcata - da ravnešu nemreš ni zamisliti, bela, belcata crta. Da crta - crturina! Kagdar ju je neko z ravnalom povlekel il se z klizaljkom prek ekrana poškljiznul i ostavil vgraviranu belu crturinu. Prek cele desne strane ekrana. I tak mi je, eto, ostala preveč lepa na ekranu pritefterena bela, belcata crturina, kakti nekakva digitalna pritefterena značka - nek se zanavek sečam tog bilogorskog gajdanja. Bormeš i bum.

"Rupa gdi je vlezla tišina."

Posle te bele, ravne, ravcate crturine, več mi je bilo preveč sega. Al, ko me teral da z biciklinom v pol veljače, posle tri frtalja tijena kaj se zlevala kiša, sam z sebom (i z navigacijom v aplikaciji kaj se zove Komoot) krenem gajdati z jednog na drugi bilogorski breg? Z mojih pedeset nekaj godin na plečima... Ama, neje to opče vredno pripovedati. Ne bum kmečal, cmizdril, ni zanovetal, ne bum ama baš ništ javkal - al bum pisal dale. A ti, ak još nesi odustal i ak te ko jogenj peče kaj je bilo dalje, evo ti ga na, pak si čitaj dalje. Ne bum nikaj skrival, ne bum delal zuluma od gajdanja, neg bum kak Dudek z Gruntovca se napisal dale, točno kak je bilo. Morti sem ti malo dosaden? Kak očeš. Ja pem, evo, samo kaj nesem krenul pisati dalje... Evo. Tak je bilo - kak je bilo, valda je Onaj tam gore... valda je On štel da baš tak se bu. Najbitneše od sega je da se On preveč za mene fort skrbil. Da neje, ma ne bum ni zamišljal kaj je se moglo biti. Zakaj sem išel, ko razme, razme, a ko ne razme - nikom se ne bum  spovedal, a bormeš ni opravdaval. Navek nekaj bude kaj te tera delati nekaj kaj bu neko rekel da si malo vudren, bedak, da si ovakov, da si onakov, da ti fali ovo, da si - trla, lalala... Dok sem se, posle bormeš fanj dugačkog pentranja, iliti gajdanja, po strmom bregu došel v center Velike Pisanice, navigacija mi je glasno rekla: "You have arrived!". A kam? Kam sem upravo stigel? - V glavi mi se ko brdusina zrodil veliki upitnik. Kam sem, pak, stigel? Vu Veliku Pisanicu. Sigurno mi se v sebi ta navigacija baš lepo cerekala. Ta odura jedna - "NA-VI-GA-CI-JA". Mislila si je da sem dogajdal do rodne mi Pitomače, zapraf do moje iže, a ne 45 kilometrov od te iste iže! Nesem mogel verovati da su mi vuva čula da ta odura ama baš tak misli. Mam sem pogledal v Komoot i videl da sem si zapraf sam kriv - nesem zebral "round trip" neg' "one way"... Kmica mi je opala mam na joči. Iža mi je daleko, naze moram dojti čim bržeše. Al, na muki se zrode junaki!

"Vrj po kojem sem se z biciklom pentral vu Veliku Pisanicu."

Bormeš sem bil fleten kak strela. Ko veter sem zel tu oduru, Komoot i iskal najkrajši put k iži. Komoot je "rekel" da je to negdi dvajzdevet kilometrov, zel sem mam tu rutu... preslekel sem si gornju obleku - bila je mokra kak da ju je pol Drave opralo. Pojel sem si dve-tri datulje, srknul sem si najfinešu vodu z elektrolitima. Odma sem zgrabil biciklina i primil se gajdanja kak se šika, grbavom crtom kaj ju je Komoot gizdavo pokazival. Pičil sem kak strela. Al znaš kam sem pičil? Drito v šumske steze, z kalom do kolena. Šlus! A štel sem taj glib zaobiti makar kak. Jezuš, Kristuš - "Svud go kamen noge gaze, trudne noge...", pajdaš Pero z Grabrovnice mi se obratil v glavi.

"V šumi gdi svet čkomi."

Ljudi moji, tu mukama mojim još neje došel kraj. Zabil sem deti v zube magnezijevog direkt praška. Dok sem se komaj pentral v breg, na čijem vršku više neje bilo belog dana, neg se lovila siva kmica. Kmica, ljudi moji, kaj bu z sive v ko mrakaču crnu farbu prešla! Uuuuu... najemput me zgrabil za mišić desne noge, onda za mišić v levom ramenu. Grč, grčeviti kakti zgrčena loza v Aršanjskom bregu. Zato sem imal dva put po petnajst minut "zen samo-masažu". Okre mene nigdi nikog, ni žive duše, ak ne računaš kal i šumu kaj fort samo čkomi. Na kraju me, blizu Velike Čerešnjevice celog poštroknula mrakača. Gajdal sem kak da sem na Tour de France-u. Z kreščavim lampama, vleznul sem v selo. Cucki su bavkali i bežali okre mene, nesem ih šljivil ni pol posto - herc mi je menše lupal - kmica je ostala iza mene.

Z bandera je padalo žuto svetlo.

Akvareli kaj sem ih posle nafarbal, to nesu slike blata – to su slike sega kaj ti ostane negdi v tebi, vnutri, v duši. To ostaje za navek.

"V blatnjavoj zemlji prvi glasnici prolječa."

"Nemreš ga čuti, al bormeš osečaš taj put."